Browsing the archives for the 講旅遊 category
好耐冇行過山，最近既週末，連續落o左幾個禮拜雨，今個禮拜天文台話會有大半日天晴，只好把握時間，星期六就出動，朋友話天氣酷熱，行山要以輕鬆為原則，我就提議去破邊洲，想影吓六角形石柱奇觀，初頭諗住好Easy，可以慢慢行影吓相，應該問題不大，所以帶齊full gear出發，想不到會由三十幾度行到狂風大驟雨，由風和日麗行到三號風球， 能夠完成行程，都係靠住一份傻勁，當然還有朋友的互相支持，下次都係行返段初級班先。
今次行程係由萬宜水庫東壩出發，經石級上山到咀邊(即十字架位)，影吓破邊洲全貌，再沿花山腰去白腊仔，到白腊村士多可以食個Tea，之後回程。
行程：破邊洲 到 白腊
需時：約４－５小時
交通：由北潭涌郊野公園打的到東壩紀念碑(HK$60)，從路旁石級起步
必備：防晒，水，長褲
注意：
中途沒有補給，糧水要預多
最好著長褲，經過的山路，矮樹好刮腳
回程可要係白腊士多call的士
每個人去旅行，都有自己既目的同意義，有人想放假relax下，有人想為o左shopping，有人想去見識下，隨住人生既每個階段，旅行既意義可能也會改變，我早期既旅程，應該要倒帶講返十年前了….，會熱衷去一d大城市，和先進發逹既國家，依稀還記得當年既一個半月歐洲之旅，都係全憑心口掛住一個勇字就出發，全程都要慳住洗，捱長麵包，訓火車站，搭夜火車，呢d就係青春既本錢，旅程雖然係辛苦，重撞過好多次板，但就好享受呢種流浪式既旅行感覺，每日都係驚喜，每日都咁新鮮，同一班旅館中萍水相逢的朋友，就可以傾上一個通宵，明日又各走天涯，如果問我的旅行意義，我相信旅行是一種體驗和一次經歷，唔係單純既吃喝玩樂，走馬看花，好多朋友話，邊度邊個地方都冇o野睇，食住又唔得，有乜好去，如果只為風景而去旅行，我諗都係留係屋企睇電視和雜誌會更舒服，何必長途拔涉呢，近幾年我去的地方都不算是大城市，我會選上一些小鄉小鎮，因為喜歡那種簡樸的人情味，喜歡那些友善的笑容，小朋友既笑容是最天真無邪，你會發覺，快樂其實就係咁簡單。
你今日快樂o左未?
今日走去旅遊展，上午的人不算多，可以慢慢行，今年只可單次入場，即係出o左去就唔可以再入場，今年展場其實唔算好大，所以冇乜所為，例牌都係有抽獎和有禮物派既展廳最多人，重有就係東南亞和日本廳，我就剛好相反，越冷門既國家我就越有興趣，今次都攞o左好多資料，去唔到都可以望梅止喝。
Hong Kong, CHINA